من تاريخ تنقاسي
ناجي الحردلو
أقباط تنقاسي السوق من بداية العشرينات لحدي الخمسينات:
في أوائل العشرينات الثلاثينيات والأربعينات والخمسينات كانت تنقاسي واحده من أجمل المدن السودانيه علي الإطلاق..وربما كانت تضاهي في ألقها وسوقها الكبير مدن كأم درمان والأبيض وبورتسودان.
نعم كانت تنقاسي واحده من أهم المدن التجاريه في السودان وكان يقصدها التجار من جميع انحاء السودان ومن خارج السودان حتى أنها أصبحت مستقرا لعائلات كبيره وكثيره جدا إلى اليوم..تمتد أصولها لمناطق في جنوب مصر وفي العراق وحتى بلاد الشام وغرب أفريقيا.
كان الكثير من الأقباط يسكنون في تنقاسي ويعملون فيها حتى أنهم أصبحوا علي علاقات قوية جدا مع اهل تنقاسي الذين ودعوا من رحل منهم بعد الإستقلال بالحزن والدموع.
،
من أشهر الأقباط الذين كانوا في سوق تنقاسي:
١/ مسعد حنا عزيز وليم:
زوجة مسعد ده كان إسمها نقيه وكانت ترزيه مشهوره.
و مسعد كان تاجر أقمشه في الصف التحت جنب دكان عثمان الحرزاوي ودكان حسن غُريبه ودكان مرقص.
والصف ده بي خلاف الصف الفيهو عبدالقادر محمد عبدالقادر وعوض الله باشري صاحب دكان العطاره طبعا.
أولاد مسعد كانت أسماءهم سعد وجابر وصبحي وولدين آخرين وبناته كانت أسماؤهم فدوى وفريال.
2/ عزيز حنا عزيز:
عزيز كان ترزي في السوق وكان راجل وديع وهادي الطبع.
ودكانه كان شرق الجامع في الصف الفيهو دكان محمد شريف والخال عوض الحردلو والجد كريره.
ونفس الصف الفيهو قهوة حمد الببا وقهوة مدني ودكان عبدالله الحلاق وابن عوف ودعبيدالله ودكان الطاهر ودعبدالقادر.
زوجة عزيز ده كان إسمها لطيفه وكانت لطيفه دي شخصيه لطيفه بالإضافه لي انها كانت ترزيه نسائيه مشهوره جدا في كل البلد ومحبوبه جدا" تخيط للسودانيات أقمشه جميله زي قماش التيل و التيبراكو والباتيستا والتريفيرا وثوب الزراق وبت الباشا والرمش والبنات والصيف وأصبح الصبح. ولطيفه كانت ماهره جدا جدا في فن الخياطه كما إشتهرت أيضا بعمل الجبنه البيضاء والجبنه الرومي والفسيخ والمش وكانت تبيعها في البيت.
أولاد عزيز حنا:
الأكبر كان إسمو فرنسي ثم وليم وبنته إسمها ليلى وكانت أكبرهم جميعا.
وليم كان أصغرهم وكان موجود في السودان لحدي سنوات قريبه وكان إستشاري جراحة عظام وبيته جنوب مطعم جاد في شارع المطار .
3/ مرقص ...
مرقص ده
كان تاجر أقمشه دكانه كان في الصف التحت برضو وكان رجل أنيق جدا ولبيس..وكان يحب يلبس البالطو في الشتاء ويلبس العبايات المطرزه فوق الجلابيه ويتلفح بالملفحه.
4/بدير ...
بدير كان برضو تاجر أقمشه وكانت أقمشته يابانيه أصليه ودكانه كان برضو في الصف التحت.
اولاد بدير ماكانو معاهو في تنقاسي وكان كثير السفر وعلى مايبدو كان بيسافر لهم.
بدير كان مشهور بجودة بضاعته لدرجة إنه غنوا ليهو مره:
يايمه أريد عاشه قماش بدير الياباني الزعّل الحرير ...
المصريين في سوق تنقاسي:
1/ ربيع
ربيع تاجر خردوات كبير ومشهور ..كان عنده دكان كبير في محل دكان ودسعدالله الجنب أبوريده..وكان فيهو العسل بالصفائح واللكوم والأناناس المعلب والشاي الكيني والسريلانكي بالصناديق الكبار.
وكان فيهو سكر الراس الملكضم بالشوالات..السكر البيكسروهو بالبلنجة أو الفرار.
ربيع ده كان ساكن جنب الدكان في محل دكان صارقيط وعلي فتيحابي فيمابعد ..
اولاده : كان عنده ولد واحد إسمو حمدي وبناته كانوا سوسو واخريات ومرته كان اسمها نزله وكانت مرة فاضله وكانت مشهوره بي فن صناعة الخبيز الجيد.
2/ ودفهمي (محمدسعد فهمي)
صاحب قهوة ودفهمي المشهوره الكانت جنب دكان عبدالحفيظ الأنصاري ومحمد ود دوانه في الزقاق القصاد باب الجامع الشمالي موازيه لي قهوة أبو الدوك.
مرتو كانت من مروي شرق اسمها عاشه وكانت مره مشلخه شايقي.
ودفهمي كان عنده ولد من زوجتو الاولى الماشفناها إسمو احمد.
لكن أولاده من عاشه كانوا ابراهيم وفتحي وبنتو كان إسمها فاطمه.
ونواصل ... لو في العمر بقية
عندك اي موضوع للتوثيق ينشر بي اسمك
